Nr. 204 Oefening 2.4 - Cursus Berghs
Geplaatst op dinsdag 19 oktober 2021 om 21:51
(druk op de witte afspeel driehoek om het voorlezen te starten)
Hendjes gevouwe
Hi-j was twaalf joor old, dus nog net onder de laeftiedsgrens, um met te doe:n met de joorlekse kindsheidsprocessie. Dit katholieke spektakel beheurde niet tot de belangrieke feestdage in ’t kerkelek joor, maor was wel de meest exotische. Dus was de vraog, welke rol hi-j dit joor zol magge spölle.
’t Lie:fst natuurlek prie:ster! Dan mog hi-j helemaol veuráán ’n helen trop gewone geleuvege aanvoere, de minse zaegene en de hostie uutdele, tenminste doen as-of.
’n Vremp woord: Kindsheid. Woor ’t heerkwam, wis’e nie:t. Dat ’t al meer as honderd joor besting en aover de hele wereld gebeurde, ook nie:t. En dat ’t allemaol veur de heidense kindere in wied afgelaege lande was en de olders door ’n tweeënhalve cent per maond veur neerleie, dah ging allemaol aan ‘m veurbi-j.
Naodat hi-j aover zien teleurstelling hen was, dat’e alleneg maor as misdienaar naeve de prie:ster mog staon, mos hi-j aan de slag. As koorknaap hoog baove de minse achter bi-j ‘t örgel had’e namelek gin ervaring met ’t assistere onder op ’t altoor. Den langen toog met superplie, wah indrukwekkend! Hi-j kreg ’t allemaol aangemaete op school. Kiste vol met klere. De eige hemdsermele moste wel teruggeslage worre, want anders was ’t gin gezich. En vader zol toch ook efkes de schoe:n motte boene!
Op de grote dag was ’t opstelle bi-j ’t klooster. ’n Lange stoet was ‘t. Gelukkeg sting hi-j as misdienaar bi-jnao veuraan. Zuster Agatha kwam speciaal op ‘m af, umdat hi-j maor uutfiegeliere blef, hoe hi-j zien hendjes netjes in de vouw kreg. Minse minse, wat ’n falderatie zo net veur de stat! Krie:g dah maor ’s veur mekaar, um de duume zo aover mekaar te krie:ge as ’n echte misdienaar dah dut. Wat ’n fiemelwark en de zuster wier d’r niet aardeger op.
Loos ging ‘t. Van ’t klooster naor de kerk. ’n Trop minse naeve de weg. ’t Hele darp was uutgelope. Maor den armen misdienaar zag door weineg van. Hi-j deej niks as zweite um zien duume met de gevouwe hendjes te laote samewarke.
Vraag:
- Waorum zag de missendiener bi-jnao niks van de minse aan de kant van de weg?
Antwoord <link>
Navigatie:
Tekst: Antoon Berentsen
